Acts 4

Petoloki Zohaneki Kanisoleti Vovo'ningu' Minasine'

1Petoloki Zohaneki gamazi ne'mine li evene' li-ngimi nizasivo eveneto' medeli mini O'moso inite' lehizi-daa' ave nabasi mono' numuno nabau' gizebo iga' ave pilisi veti guve'inesi ve nabasi Sadukaio' evene' masi engita igi heteli nizavo 2evene' apizi ngimi O'moso'mo Izesu'ni hilinguti' do ote-dine' ne'mine ogo evene' masi do ote-ngedeleseive li lasingumu' gili goloso igi 3a'nido' diki ti' li lani': Nivenga' mo molako aize' goni' o-ngedelone li na'nava numungu' huli-ngidani'. 4Ne'mine i-ngidani'za lasine' gamazi gilave muki' nene gili ele'vole' ani'. Ido' ne'mine ikevo gili ele'vole' ave nene imine' milikevo naba'ine nene faef tauseni (5,000) ine'.

5Ingi go' lavo Zuda veliti guve'inesi vesi mono' gizebo vesi mono' apizi ngimaa' avesi Zelusalemi numuda mulise milani'. 6Ee, eveneto' medelo mino O'moso inite' lehize-daa' ive naba Anasi' ve Kaiaha' ve Zohane' ve Alekisade' ve ido' eveneto' medelo mino O'moso inite' lehize-daa' ive naba'mi zuho mukikisi mulise mili mini 7aposolo ngele'mizi di igi vovo'ningu' di oti-ngidi ti' li longo' i-ngidani': Ve a'ne'minelitise lingine zahidati' amuzo di ido' zahi gulivelo' me suno dasive. 8Ti' li longo' i-ngidikevo O'moso'mi Sikalahuli'mo Petolo' lulou' gono davo aza ti' lo lo-ngimine': Evene' guvetesi vekizo, ido' gizebo vekizo, 9ve gebili ma do lamine' o-dusine' mamu' nene nadi' igi di lamine' i-dasive li longo' nii-lidahe. 10Linginesi Isilaele' aleve mukikisi gililizave lo lo-lengemeloze. Gililo. Nasalete ve Izesu' Kilisito'ni langisetine lohoto' zalo' bilikevo O'moso'mo hilavetidati' do ote-dive ne'mi amuzo'velo' me ve nene lamine' ogosa vetida ote neive. 11Mono' godolou' gamazi ma ti' li gizi nizani' ma neive:

Numuno gizaa' geheni lingine numuno gizaa' ave nete ningi hulani' ne'mo nene geheni muki' ngivile' ogo numuno do amuzo molaa' geheni
lolo' ogo neive.
12A'mine geheni nene Izesu' ve. Numudo' namado' ve lelikuti' do lu' izelive gohi ma nomive. Ado' eze gulivelo' lamine' olonive gohi ma nomive. Ei' hamokovo' nene neive lo lo-ngimine'.

13Ne'mine lavo Petoloki Zohaneki ngehelele izamivo gamazi livi' kiselivi' igi lasine' nemu' ingine sukulu ma lamasive haza ve matise ve li gili sizaga li Izesukisi maka' minasive matise lasi nave li gilani'. 14Ne'mine igi di lamine' i-dasive nene engikisi minavo ningi ngelemilizani' gamazi vise' igi hulani'. 15Vise' igi huli goni' numunguti' ngele'mizi heto' igi engikovo' ti' li li gili ha gele ani': 16Ve mene nadi' o-ngedelone. Ingine ato' suno dikesive li Zelusalemi aleve muki' nene gili osu' likenako laza nadi' ogo ataize lo-ngedelone. Ne nomive. 17Nemu' a'mine gamazi hutile' ogavo evene' masi gilikelizave lii Izesu' gulive ihe' gohi li soto' igi li-ngimamilizo lo ga'ine dalone lisa 18alizo li asi li-ngidani'. Asi li-ngidikevo ikesivo Izesu'nimu' li-ngimi eze gulive gohi li soto' amilizo li o've li amuzonga li li huki-ngidani'. 19Li huki-ngidikevo Petoloki Zohaneki di velepe' izi ti' li li-ngimasine': Langisetine gili ningilevo. Lengi' eveneliti gamazi gele do O'moso'mi gamazi gele hulokusivo O'moso'mo gilivo lamine' ilihe. 20La'lisete ningo gilusine' inite' nene nanitekumu' hiteko minelesive. Lo soto' soto' ogo minelesusive. 21Ne'mine likesivo gizebo ve naba' naba ingine ngehelele izine' gani gohi li-ngimi soto' ine' initekumu' nene evenelite O'moso opo'ni li minanako lilimikelizave li ngibililizani' akamu' vise' igi haza ngimiseli hulikevo vasine'. 22Golize inite' di di lamine' i-dasive nene kilisimasi've foti (40) ivile' ogo minine' nenako nemu' evenelite O'moso opo'ni li minani'.

Izesu' Gamazi've Lovo' Kiselevo' Ogo Lolone Li Eze Zuho Nete O'mosola Lani' Gamazi

23nGimiseli hulikevo limi ingine zuho nizada vi eveneto' medeli mini O'moso inite' lehize-daa' ave nabasi mono' gizebo ve nabalitesi li-ngidani' gamazi nene vetete' igi li-ngimikesivo 24gili lu'ine mili hamo' igi O'mosola li ti' li lani': Vozeu' ve Guvekasi ve, Okulumo' misubo guvo noso ido' a'mingu' minani' inite' muki' do soto' aniveke, 25Sikalahuka ne'mo geze gelekele' gipa avoteho Davidi'ni nene do ote-do gamazi veleu' molavo ti' lo line':

Evene' heta ato' ve nene ngizebolo' molavo gopo gani lani' nene
ido' evenelite haza gopo igi gamazi goloso li hukani' nene nanimu' neve.
26Misubou' misubou' veti guve'inesi ve ido' gizebo ve'ine ingine,
Guvelesi vesi ido' ve naba ve lo do kegese-divesi nene lovo o ngemelone li
di nene igi di gese' ave lo line'.
27Ee, lulo laminekisi gelekele' gipa Izesu'ni nene do lu' izelive ve lo eze do kegese-danive nene lovo imilisa Helode' ve Podio' Pilato' ve heta ato' vesi Isilaele' alevesi ingine lamine' mene ebeku' di gese' igi 28gasika gozopo' gaka gelo amuzokalo' molo gelo salani molo-dane' inite' nene i-dani' ve. 29Ne'mine ani'za Guvetesi ve make, lehelele izine' gamazi lani' nemu' gele mino gamazika livi kiselivi' igi lilizave lo gelekele' veka leli' nene vete do lapa nomine' o-ledo 30amuzoka lemanivo inite' gizi dave do lamine' o-ngedo eze monovo ningilizave lo gelekele' gipa lulo laminekisi Izesu' gulivelo' ato' suno do gono dalone lo nolune li lani'. 31Ne'mine li O'mosola likevo di gese' igi minani' numuno nene gulukulu' ogo mo'mongo' ogavo O'moso'mi Sikalahu' ne'mo lu'ningu' gono do ve'ine do lapa nomine' o-ngedavo O'moso'mi gamazi livi' kiselivi' igi golise gilami li-ngimika' i'mi minani' ve.

Inite' Mata' Nene Mukito' Inite'ine Di Minani' Gamazi

32Ido' gili ele'vole' igi minani' aleve ingine lu'ine ga'ine mili hamo' igi inite' mata'ine di minani' nene gei' initeka ve neni' inite'ne ve lami mukito' inite'ine di minani'. 33Ne'mine igi nizavo aposolo ingine Guvelesi ve Izesu' hilinguti' otine' gamazi nene amuzo mili li soto' i ngimi' ngimi' igi minikevo O'moso'mo hize ele' o-ngedavo evenelite ingine mukikumu' ningavo lamine' ine'. 34Numuno nehe misubo nehe inite' me'ninge nete meni've di di vi aposolo ngimikevo evene' linge ma inite' mamu' vise' ikevo ma vise' ani' votigile ngimaa' avo engikuti' ve mali'mosi initekumu' ma vise' amaa' ine' ve. 36Ido' ne'mine suno nene Zosehe' nesi dani' ve. A'mine Zosehe' nene aposololite gulive gohi ma Banabasi' ve li mili-dave Levi' a'vopilemo' zuho mono' gono daa' aveuti' minive ado' Kipilo ailaniu' soto' ivemu' noluve. Ido' a'mine gulive Banabasi' ne'mi monovo nene do ngu' izaa' ive ve lo neive. 37A'mine ve aza ebe' za zuho've ma do minine' nene meni hizikevo moni do aposolo do vo ngimine' ve.